ZUNKAWNG HNAI/LAWNG ENKAWL DAN

ZUNKAWNG HNAI/LAWNG


HARSATNA DANG AWM THEI
.
Enkawl ran chuan zunkawng hnai hian harsatna dang a thlen tlem hle a, mahse enkawl that loh erawh chuan nunna atan pawh a hlauhawm thei khawpin a nasa thei a ni.
Enkawl that lohva harsatna dang awm thei te chu, Kal vung/lawng-hei hian kal a tichhe vek thei a ni.
Nu nau paiah nau-piang te (Low birth weight) emaw thla kim lo va piang a thlen thei a ni.
.
TESTS LEH DIAGNOSIS
.
Natna hriat chhuah nan heng test thenkhat hi an ti thin:
.
**Zun exam. Zun lak dawn hian hmeichhiaah chuan serh biang kuta keu then phawt hnuah tlem zun phawt tur a ni a, zun vanglai (laihawl) vel tak kha dawh dur a ni.
** Zun Culture (Kui tiak). Hei hian kan damdawi hman tur chu natna hrik huat ber eng ni ang tih hriat theihna a ni.
** Ultrasound leh X ray. Zun kawngah chuan fel lo eng emaw a awm em an fiah na turin hei hi tih a ni chawk bawk thin.
** Phing en. Zunkawng hnai nei ngun lutuk i nih chuan Cystoscopy an tih hmangin phing en/exam a ngai mai thei bawk.
.
ENKAWL DAN :
.
Antibiotics hi he natna enkawl dan ber chu a ni kan tih tawh kha. Damdawi ei rei zawng erawh chu i natna a nasat danah a innghat ang.
Natna naran Zun-kawng lawng naran deuhah chuan heng te hi hman a ni tlangpui:
** Sulfamethoxazole-trimethoprim (Bactrim, Septran,etc)
** Amoxicillin
** Nitrofurantoin (martifur etc)
** Ampicillin
** Ciprofloxacin (Cipro)
** Levofloxacin (Levoday etc.)
.
A tlangpui chuan ni 5 atanga ni 7 velah hetiang hi chu a dam mai tura ngaih a ni.
Hei bakah hian na-chhawkna leh i zunkawng na hriatna ti tlem deuh tur damdawi chawh tel i ni mai thei bawk, zun rawng a danglam hret pawhin buai loh tur.
.
ZUNKAWNG LAWNG/HNAI NEI ZING : A hmaa kan tarlan tawh damdawi te kha hun rei zawk ei ngai pawh a ni thei a, tin, damdawi tan hmain culture tih hmasak a tul thei, hei bakah hian a chhan zawn chhuah nan test dang kan sawi tawh te pawh kha tih a ngai phawt thei a ni.
.
**Natna Nasa (Severe): Natna a nasat chuan damdawi inah awmin damdawi chiu a ngai mai thei.
.
TUALCHHER DAMDAWI
.
**Cranberry Juice : Hei hi a Mizo tawngin eng nge ka hre mai bik lova, he juice in hian zunkawng lawng/hnai a veng thei ni awmin study thenkhat chuan an tarlang.
Eng ti anga in tur nge engzat a tam nge in tur tih pawh a chuang chuang lo va, a tui i tih zawng a nih chuan in țhin la a pawina a tlem khawp mai, harsatna awm ve thei chu kua a ti nuam lo ve thei tih mi thenkhat chuan an sawi.
Amaherawhchu i lung lam vang emaw a Warfarin/acitrom etc. i ei a nih chuan in loh a him ber tih hria ang che, thi put a siam vak thei.
.
TIH THEIH
.
Zunin hi a hrehawm viau thin a mahse tlema a zia awm ve dan chu:
.
** Tui in tam rawh .
** Coffee, zu, limbu tui in loh tur. Zun thip/sa a tizual thei.
**Tuilum ip. Tai na laia tulum ip lum (Sa lo se) dah a nuam mai thei.
.
INVEN DAN
.
Heng te hi zunkawng hnai/lawng laka inven theihna awlsam te chu an ni:
** Tui in tam. Ni tin litre 2 tal a tlem berah in tum rawh.
** Mawng sil dan. I daikal zawha i mawng i sil reng rengin hma lam atangin hnung lam hawi zawngin kut nuai thin ang che (hmeichhe tan bik).
** Nupa nun hman zawhin zun tur. Hmeichhe tan a pawimawh zual.
**In hnawih rimtui. Hmeichhe tam takin an kumkar tih rimtui nan powder leh hnawih chi thenkhat an hman thin hi fimkhur a tha hle bawk.