.
*ȚHALAITEN ȚAWNG FIAH ZIR THAR LEH ANG U.*
. _- PC.Thangzikpuia._
Naupang, 'Kal chhet chhet' leh 'Tumbailek' thiam avanga ar tui hlawh chhuak ve tawh; mahse, țawng zir țan mêk, la țawng fiah thiam si lote hian, "Ka nu, ka pa," tih turah hian, _'ka'_ hi an la lam rik thiam ve loh avangin, "Â-nu, â-pa," tih an chîng a. Hêng naupang la țawng fiah thiam lote țawngkam hi nula chu sawi loh, tlangvâl sek țha pui puite pawh hian an lo entawn ta zel a. T-shirt bân bul ha sek țul chung leh, pheikhawk size lian ber chi rap per duai chung hian, "Â-nu ka lo dil ang e aw," te hi an han ti ta duai zel mai a! An nute mal chunga nghah chawrh a, "KE-A—Ka, EN-U—Nu," tia _A, AW, B_ zir țhattir leh tak mai hi an châkawm țhin!
"Ka nu, ka pa," tia kan sawi hian, heta _'ka'_ hi kan thil sawi azirin neitu aiawh atâna kan thu hman, _possessive pronoun_ a ni a. _'Ka'_ hi noun thumalin a rawn zui nghal chat chuan, kha noun kha ka ta a nih thu leh a neitu ka nihna a lang nghal chat zel țhin. "Ka nu," kan han tih hian, heta _'nu'_ kan sawi hi tu nu dang mah ni lovin, ka ta, keimá nu bik ka sawina a ni ta chat a. Chutiang bawkin, "Ka pa," kan tih pawhin keimá pâ ka sawina a ni țhin.
Hetianga Mizoten neitu aiawh atâna țawngkam țha êm êm mai kan neih, _possessive pronoun_ hi naupang țawng zir țan tirte chuan an la lam fiah thiam lo a ni thei e. Mahse, tunlaia kan țhalai tam taktena an lam ri fiah thiam lo ve ta zel mai hi chu a manganthlâk ta a ni.
.
Social media lama WhatsApp-ah pawh țawngțaipui tura ngenna thu hi nula pakhatin a rawn post a, "A nu leh a pa tân in lo țawngțai ve theih chuan kan lâwm ngawt ang," a rawn ti ngawt mai a. Heta _'a nu leh a pa_ tiha _'a'_ hi mi dang tu emaw sawina (third person pronoun) a ni daih mai si a, a ziah dân turah kawng a bo leh zel vei bawk nen, "Tu nu leh tu pa tân chuan rawn ngensak chu ni maw?" lo tih mai loh hleih theih a ni lo. "Ka nu leh ka pa tân..." rawn ti fiah țha hle hle mai sela ni mai tur hi a ni a le!
.
Țhalaitena inlâk eng emawna ni àwm fahran a, "Â nu, â pa," an tih duai duai ang hian, nu leh pa leh an û-te hian, "Â fapa a nih hi," emaw, "Â fanu a nih hi," ti ten emaw, "Â nau," te emaw han ti ve ta hlawi hlawi mai sela kan duh àwm tawp si lo.
.
Inkohna bik atâna kan lo hmang țhang tawh a nih chuan, tute emaw inkoh dân a nih chuan tu'n kan va sawiselsak ngawt thiang lo vang; chu chu anmahni inkâr thu a ni tlat. Amaherawhchu, mi dang hnenah kan nu leh pa, kan û-te kha third person-a anmahni kan sawinaah reng reng hi chuan țawng fiah rual tawh chin hi chuan, "Ka nu, ka pa, ka û," tiin lam ri fiah fel fak ila a țha. Mi zinga mahni nu leh pa, u-te third person-a kan sawinaah pawha, "Â nu, a pâ, a û," la tih hlawi hlawi mai hi changkânna a ni hran lo va; naupang țawng fiah thiam lote țawng dân, a tumbailek hawi zawnga kan zir chhâwn lehna mai mai lek a ni.
.
Neitu kan nihna tilangtu atâna keimahni aiawh atâna _possessive pronoun_ kan neih, _'ka'_ tih hmanga mahni nu leh pate mi dang hnena kan sawi chhawnnaah, ka ta, keimá nu leh pa liau liau an nihzia lantir a, "Ka nu, ka pa," kan han ti fiah chat chat mai hi Mizo țawng kalphung dik a nih rualin, keimá nu leh pâ an nihzia kha kan tilang hliah hliah bik a, a hlu êm êm zawk a ni.
.
Hmânlaia naupang in nghâk, ruah sur laia an nu leh pa losul feh au vau vautute mah khân, "Â nu, â pa, lo haw thuai thuai," an ti hlei nem! "Ka nu, ka pa, lo haw thuai thuai, tlângah ruahpui a sûr e...." an ti fiah fel chat mai a nih kha! Eng kan ti ta nge, tuna taka kan țhalaite hian 'Ka nu, ka pa' tih hi kan han lam fiah hleih theih ve tâk hlawm loh ni?
.
Third person-a _'nu'_ ka sawi hi tu nu mah ni lovin keimá nu a ni a. _'Pa'_ ka sawi pawh hi tu pa mah ni lovin keimá pa ka sawina a ni tih tichiangtu possessive pronoun, _'ka'_ lam ri fiah thiam tur hian țhalaite hian țawng fiah i zir thar țha leh teh ang u.
_(VANGLAINI)_
......
*ȚHALAITEN ȚAWNG FIAH ZIR THAR LEH ANG U.*
. _- PC.Thangzikpuia._
Naupang, 'Kal chhet chhet' leh 'Tumbailek' thiam avanga ar tui hlawh chhuak ve tawh; mahse, țawng zir țan mêk, la țawng fiah thiam si lote hian, "Ka nu, ka pa," tih turah hian, _'ka'_ hi an la lam rik thiam ve loh avangin, "Â-nu, â-pa," tih an chîng a. Hêng naupang la țawng fiah thiam lote țawngkam hi nula chu sawi loh, tlangvâl sek țha pui puite pawh hian an lo entawn ta zel a. T-shirt bân bul ha sek țul chung leh, pheikhawk size lian ber chi rap per duai chung hian, "Â-nu ka lo dil ang e aw," te hi an han ti ta duai zel mai a! An nute mal chunga nghah chawrh a, "KE-A—Ka, EN-U—Nu," tia _A, AW, B_ zir țhattir leh tak mai hi an châkawm țhin!
"Ka nu, ka pa," tia kan sawi hian, heta _'ka'_ hi kan thil sawi azirin neitu aiawh atâna kan thu hman, _possessive pronoun_ a ni a. _'Ka'_ hi noun thumalin a rawn zui nghal chat chuan, kha noun kha ka ta a nih thu leh a neitu ka nihna a lang nghal chat zel țhin. "Ka nu," kan han tih hian, heta _'nu'_ kan sawi hi tu nu dang mah ni lovin, ka ta, keimá nu bik ka sawina a ni ta chat a. Chutiang bawkin, "Ka pa," kan tih pawhin keimá pâ ka sawina a ni țhin.
Hetianga Mizoten neitu aiawh atâna țawngkam țha êm êm mai kan neih, _possessive pronoun_ hi naupang țawng zir țan tirte chuan an la lam fiah thiam lo a ni thei e. Mahse, tunlaia kan țhalai tam taktena an lam ri fiah thiam lo ve ta zel mai hi chu a manganthlâk ta a ni.
.
Social media lama WhatsApp-ah pawh țawngțaipui tura ngenna thu hi nula pakhatin a rawn post a, "A nu leh a pa tân in lo țawngțai ve theih chuan kan lâwm ngawt ang," a rawn ti ngawt mai a. Heta _'a nu leh a pa_ tiha _'a'_ hi mi dang tu emaw sawina (third person pronoun) a ni daih mai si a, a ziah dân turah kawng a bo leh zel vei bawk nen, "Tu nu leh tu pa tân chuan rawn ngensak chu ni maw?" lo tih mai loh hleih theih a ni lo. "Ka nu leh ka pa tân..." rawn ti fiah țha hle hle mai sela ni mai tur hi a ni a le!
.
Țhalaitena inlâk eng emawna ni àwm fahran a, "Â nu, â pa," an tih duai duai ang hian, nu leh pa leh an û-te hian, "Â fapa a nih hi," emaw, "Â fanu a nih hi," ti ten emaw, "Â nau," te emaw han ti ve ta hlawi hlawi mai sela kan duh àwm tawp si lo.
.
Inkohna bik atâna kan lo hmang țhang tawh a nih chuan, tute emaw inkoh dân a nih chuan tu'n kan va sawiselsak ngawt thiang lo vang; chu chu anmahni inkâr thu a ni tlat. Amaherawhchu, mi dang hnenah kan nu leh pa, kan û-te kha third person-a anmahni kan sawinaah reng reng hi chuan țawng fiah rual tawh chin hi chuan, "Ka nu, ka pa, ka û," tiin lam ri fiah fel fak ila a țha. Mi zinga mahni nu leh pa, u-te third person-a kan sawinaah pawha, "Â nu, a pâ, a û," la tih hlawi hlawi mai hi changkânna a ni hran lo va; naupang țawng fiah thiam lote țawng dân, a tumbailek hawi zawnga kan zir chhâwn lehna mai mai lek a ni.
.
Neitu kan nihna tilangtu atâna keimahni aiawh atâna _possessive pronoun_ kan neih, _'ka'_ tih hmanga mahni nu leh pate mi dang hnena kan sawi chhawnnaah, ka ta, keimá nu leh pa liau liau an nihzia lantir a, "Ka nu, ka pa," kan han ti fiah chat chat mai hi Mizo țawng kalphung dik a nih rualin, keimá nu leh pâ an nihzia kha kan tilang hliah hliah bik a, a hlu êm êm zawk a ni.
.
Hmânlaia naupang in nghâk, ruah sur laia an nu leh pa losul feh au vau vautute mah khân, "Â nu, â pa, lo haw thuai thuai," an ti hlei nem! "Ka nu, ka pa, lo haw thuai thuai, tlângah ruahpui a sûr e...." an ti fiah fel chat mai a nih kha! Eng kan ti ta nge, tuna taka kan țhalaite hian 'Ka nu, ka pa' tih hi kan han lam fiah hleih theih ve tâk hlawm loh ni?
.
Third person-a _'nu'_ ka sawi hi tu nu mah ni lovin keimá nu a ni a. _'Pa'_ ka sawi pawh hi tu pa mah ni lovin keimá pa ka sawina a ni tih tichiangtu possessive pronoun, _'ka'_ lam ri fiah thiam tur hian țhalaite hian țawng fiah i zir thar țha leh teh ang u.
_(VANGLAINI)_
......
No comments:
Post a Comment