MIZO ṬAWNG ZIRNA.MIZO TE HUN SAWI DAN.

MIZOTE HUN SAWI DAN
– Lalzarzova Khiangte

Mizote hian hun sawi danah thuhmabet (prefix) leh thuhnungbet (suffix) kan nei a: hun kal tawh sawina chu prefix 'ni' a, hun kal mêk leh tun hnai deuh sawina chu suffix 'in' a ni leh a, hun lo la kal tur sawina chu prefix 'nak' a ni.
Tichuan, heti ang hi a ziah dan leh a hman dan dik a ni e:
Hun kal tawh sawina:
Ni+chin = nichin (na+chin = nachin a ni lo)
Ni+min = nimin
Ni+zan = nizan
Ni+kum = nikum

Hun kal mêk leh tun hnai sawina:
Tûk+in = tûkin (tûk+kin = tûkkin a ni lo)
Zan+in = zanin
Vawi+in = vawiin (vaw+in = vawin a ni lo)
Kum+in = kumin

Hun lo la kal tur sawina:
Nak+in = nakin
(Hei hi hun lo la kal tur ni si, a hun lo thleng mai tur sawina a ni a, nak+kin = nakkin a ni lo.)
Nak+zan = nakzan
Nak+tûk = naktûk
Nak+kum = nakkum (na+kum = nakum a ni lo. Prefix 'na' hian hun lo la kal tur sawinaah awmzia a nei lo.)